|
دستور من خاطرك!
بسام طالب
|
||
|
نوري قنبر شوفير ميكرو الجادات قال: والله على عيني الدستور الجديد! -أجابه ابو عزو العرقسوسي بياع اطيب عرقسوق بالشام والدنيه رمضان: لك ياغشيم هادا مو دستور -لكان شو هاد! دستور من خاطرك؟! -هادا يعني بتقدر تقول دستور موقت ليمشو الحال فيه لوقت تصير انتخابات وبرلمان ودستور دايم. -ايه سبحان الدايم، بس بتعرف يا أبو عزو، والله لأول مره بحياتي بحس انو عندي بلد والي حكومة وانو الشغلة بتخصني. -أجابه العرقسوسي: لكان لو تنزل على قهوة التايبين بالربوة بعد صلاة التراويح لتشوف شوفات وتسمع سمعات،الله وكيلك يا نوري كلو عميحكي كأنو رئيس جمهورية ورئيس البرلمان وكلو مثقف ومتعلم وفهمان بالسياسة والاقتصاد، ولو بتسمع يانوري ابو السيوف شوفير الدوار الشمالي وهو عميحكي كيف بدو ينظم المرور بالبلد بعد كل هالفوضى! وفجأة بينطلك واحد مابتعرفو بيقلك ماكان لازم يعملوا هيك وكان لازم يعملو هيك واذا تأخر تبع نارة الأركيلة ليجي لعندو بيصرخ وكأنو قامت القيامة وأبو محمد الورد صاحب مشتل الشادروان واللي رحلوا اربع شباب من عيلتون بيفز متل النار على كل مين بيحكي كلمة ع الحكومة! وكلو كوم والاستاذ نظمي كوم! عرفتو للأستاذ نظمي؟ -طبعا عرفتو الاستاذ نظمي ابن حارتنا اللي طالعوه شبه مجنون وميت بعد 26 سنه من سجن تدمر وبعد ماعالجوه الألمان لأنو معو جنسية ألمانية رجع شبه طبيعي وبيبلش يحكي راكز وبعدين بيبلش يخبص وبعدين بيبكي وبيسكت. -ويضيف ابو عزو: لكن الله وكيلك يا نوري اذا بدك تسمع أحلى كلام واحلى نقد وتحليل بتسمعوا من الاستاذ نظمي ووقت بيحكي الكل بيسكت ووقت بيسكت وبيبكي الكل بيبكي. -أجاب نوري كرمال الاستاذ نظمي راح روح صلي التراويح بجامع الكناني رغم انو ماشاف الجامع وشي يمكن من عشرين سنة وبعدين بنزل لعندكون على قهوة التايبين بس لاسمع الاستاذ نظمي شو عميحكي!
| ||
ما هو تقيمكم لموقع وجريدة الدبور